تیرے سِوا یہ کسی کا مقام ہے ہی نہیں

تیرے سِوا یہ کسی کا مقام ہے ہی نہیں کہ میکدے میں کوئی اور جام ہے ہی نہیں

خدا کا شُکر ہے بازار میں محبت کا سوائے جاں کے کوئی اور دام ہے ہی نہیں

ترے سِوا مری آنکھوں کو روشنی دینا کسی کے پاس بھی ایسا نظام ہے ہی نہیں

کہیں یہ کُن کا تسلسل کہیں اجل کا نظام فنا کے شہر میں نقشِ دوام ہے ہی نہیں

جمالِ یار میں شوقِ جمالِ یار تو ہے کلامِ یار میں حُسنِ کلام ہے ہی نہیں

جو اس نے بھیجا ہے میں صاف صاف کہتا ہوں کہ کائنات میں ایسا سلام ہے ہی نہیں