تختیاں لگاتے ہو زندگی کی قبروں پر

تختیاں لگاتے ہو زندگی کی قبروں پر کیوں غرور کرتے ہو بے ثبات عہدوں پر

آسماں نہیں گرتا کیوں زمیں نہیں پھٹتی کوئی ظلم کرتا ہے جب غریب بچوں پر

تم نے چاند کا رستہ ان سے پوچھ لینا تھا وہ نگاہ رکھتے تھے آسماں کے رستوں پر

کاش جھانک لیتے تم اپنے بھی گریباں میں تہمتیں لگاتے ہو کیوں شریف لوگوں پر

آپ کی ان آنکھوں سے دیکھتا مجاہدؔ ہے میں نثار ہو جاؤں آپ کی ان آنکھوں پر

میری پاکیزہ محبت کی طلب بڑھتی رہی دل ہی کچھ ایسا ملا جس کے سبب بڑھتی رہی

وقت کیوں ٹھہر گیا اپنی ہی فطرت کے خلاف ایک اک لمحہ ترے ہجر کی شب بڑھتی رہی

اک بیاباں میں ترا نام سنا، چونک گیا پھر وہ وحشت مِرے سینے میں عجب بڑھتی رہی

آج مظلوم کے ہاتھوں میں ہے تلوارِ ستم آج مظلوم کی شمشیرِ غضب بڑھتی رہی

فاصلے بڑھتے گئے اس سے مجاہدؔ میرے اجنبیت جو بڑھی، حدِادب بڑھتی رہی