شب نامہ

ایک سورج ہے جو تنویر کیا کرتا ہے اک اندھیرا ہے جو تسخیر کیا کرتا ہے

ایک شاعر ہے جو تحریر کیا کرتا ہے ایک دانا ہے کہ تفسیر کیا کرتا ہے

آج بچھڑے ہوئے احباب بلا لو یارو راز پوشیدہ خزانوں سے نکالو یارو

روشنی کیا ہے اندھیروں نے بتایا ہم کو رات کیا ہے یہ اجالوں نے بتایا ہم کو خامشی کیا ہے یہ لفظوں نے بتایا ہم کو گفتگو کیا ہے یہ قبروں نے بتایا ہم کو

آنکھ دیکھے گی تو ہنگامہ دلوں میں ہوگا جنگ میدان میں ویرانہ گھروں میں ہوگا کہیں نیزے کی اَنی خونِ گلو پیتی ہے کہیں لفظوں کی چبھن جام ِسبو دیتی ہے کہیں منہ زور ہوا دیپ بجھا دیتی ہے ہجر کی رات کہیں دل میں ٹھہر جاتی ہے

کشتیِ نوح کے احساس کی تاثیر ملے میرے لوگوں کو شناسائی کی تنویر ملے

پھول گر شاخ سے گر جائے تو مر جاتا ہے حسن بازار میں آئے تو بکھر جاتا ہے دل ترے نام سے خالی ہو تو ڈر جاتا ہے تیز آندھی میں تو آنچل بھی اتر جاتا ہے

کون سی راہ ہے جو منزل کی طرف لے جائے وہ مسیحا ہو جو منزل کا پتا دے جائے

آنکھ اشکوں کے نگینوں کے لیے روتی ہے یہ مری خاک جبینوں کے لیے روتی ہے دل کی بستی جو مکینوں کے لیے روتی ہے خاکِ مقتل جو دفینوں کے لیے روتی ہے

روح برباد ہوئی جسم بھی باقی نہ رہا جب مِری آنکھ کھلی سامنے ساقی نہ رہا

ایک دوجے کے تعاقب میں ہیں یہ شمس و قمر اسی ہنگامے میں گزرا ہے زمانوں کا سفر کہیں آدم کی وہ لغزش کہیں ایوب کا صبر کہیں لقمان کی حکمت کہیں فیضانِ خضر

رات تاریک تو پرنور سحر ہوتی ہے زندگی یوں ہی زمانے میں بسر ہوتی ہے

رات ہر روز ہی بے سحر گزر جاتی ہے رات کے بعد نئی رات اتر جاتی ہے آنکھ دیکھے جو اجالے کو تو ڈر جاتی ہے دھند ہی دھند ہے جس سمت نظر جاتی ہے

آنکھ میں تاب نہیں ذوقِ بصارت بھی نہیں رات کو نیند نہیں شوقِ عبادت بھی نہیں

رات بیدارئِ مانوسِ تمنا کی دعا رات افلاس کے مارے ہوئے لوگوں کی صدا رات قانون میں جکڑے ہوئے قیدی کی بقا رات بستر پر تڑپتے ہوئے زخمی کا پتا

ہجر والوں کی بھی اک رات ہوا کرتی ہے شبِ فرقت بڑی مشکل سے کٹا کرتی ہے

رات گرویدہ ِتاثیرِ محبت کا سخن رات فطرت کے طلسمات کا نایاب چمن رات پر نور اجالوں کا سیہ پوش کفن رات سجدوں کے تسلسل کی کہانی کامتن

لذتِ گریہِ شب خاکِ شفا پر آنسو مرحبا رات کی خلوت میں دعا پر آنسو

رات پردوں کو ہٹانے کا ہنر رکھتی ہے کالی ظلمت میں بھی ایک نور ِسحر رکھتی ہے اپنے لمحات میں صدیوں کا سفر رکھتی ہے خاک پر اشک تو گردُوں پہ شرر رکھتی ہے

مدّتِ مہلتِ گریہ ہیں یہ راتیں اپنی ایک اک سانس کا جزیہ ہے یہ راتیں اپنی

رات کا چاند محرم کی مصیبت کی نوید رات کا چاند ہی عیدوں کی مسرت کی نوید رات کا چاند شبِ قدر کی حرمت کی نوید رات کا چاندہی معراج کی رفعت کی نوید

قوتِ جنبشِ انگُشت کا منظر کیا تھا چاند افلاک سے قدموں میں ترے آن گرا

رات ناموس ِ کواکب پہ وہ پازیب کا شور رات مہتاب کی تقدیس میں ابلیس کا زور رات پُر کیف فضاؤں میں جواں جسم کا چور رات خوابوں کے چمن زار میں اقدار کا طور

رات بچھڑے ہوئے لوگوں کو ملا دیتی ہے رات خوابوں میں طلسمات دکھا دیتی ہے

رات اک گریۂ شبنم ہے سحر ہونے تک اشک بہتے ہیں تو بہتے ہیں اثر ہونے تک زندگی جبرِ مسلسل ہے بسر ہونے تک شبِ دیجور ہے سورج کا گزر ہونے تک

آؤ دیکھو کہ مری رات کٹی ہے کیسے آہ سینے میں ہے اک جان بچی ہے کیسے

رات بھر پور خیالات کی انمول گھڑی کسی شاعر نے کسی زلف کی تمثیل لکھی کسی زاہد کی جبیں خاک کے بستر پر رہی مکتبِ شوق میں ہر شمع جلی خوب جلی

رونقِ خلد کو ڈھونڈا کہ خدا کو ڈھونڈا رات بھر حرفِ دعا کو کہ رضا کو ڈھونڈا