سالِ نو

سالِ نو (ڈھلتے ہوئے سال کی آخری شام)

نئی شمعیں جلانے سے نئی خوشیاں منانے سے نئے سورج کے آنے سے مصیبت کم نہیں ہوتی گلوں کے مسکرانے سے غزل لکھنے لکھانے سے فضا کے گنگنانے سے مصیبت کم نہیں ہوتی

ہنسو، اتنا ہنسو تم شوخیوں کے اِن مناظر میں جنازوں سے لپٹ کر بین کرنے والیاں سوچیں کہ جشنِ سالِ نو کی اب کے ساعت کس طرح کی ہے نئے سالوں کے آنے سے، گئے سالوں کے جانے سے مصیبت کم نہیں ہوتی یہ کیسے لوگ ہیں اپنے مصیبت بھول جاتے ہیں جدا ہونے سے پہلے اے گزشتہ سال کے سورج! ہمارے چاند سے بچوں کی لاشوں کا بتاتا جا جگر گوشوں کے زخموں کا، جنازوں کا بتاتا جا جو جنگوں میں مر ے اُن بے زبانوں کا بتاتا جا کچھ اشکوں کا بتاتا جا، کچھ آہوں کا بتاتا جا

ردائے خواب میں چھپ کر حقیقت چھپ نہیں سکتی تبسم میں، تکلم میں، مصیبت چھپ نہیں سکتی نئے سالوں کے آنے سے، گئے سالوں کے جانے سے مصیبت کم نہیں ہوگی، مصیبت کم نہیں ہوتی

مبارک ہو مرے لوگو نئی صبحوں کے آنے کی مبارک ہوں نئی کرنیں بھی سورج کے اُبھرنے کی مبارک ہو نئی شمعیں جلانے کی، بجھانے کی مبارک ہو یہ جشنِ سالِ نو سب کو منانے کی مگر سالوں کے جانے سے، نئے سالوں کے آنے سے مصیبت کم نہیں ہوگی، مصیبت کم نہیں ہوگی