مظلومؑ کے ہاتھوں پہ جو دم توڑ رہا ہے

مظلومؑ کے ہاتھوں پہ جو دم توڑ رہا ہے

کم سِن ہے مگر قائدِ اربابِ وفا ہے

شبِیّرؑ کے مقتل سے گزرتا ہے جو اکثر

وہ اَبر نہیں ثاؔنیِ زہرؑا کی ردا ہے

یہ کون مسافر تھا جو مدفن کو بھی ترسا

یہ کس کا جنازہ تھا جو تیروں پہ رکھا ہے

زینب کی صدا سُن کے یہ جبرؔیلؑ نے پوچھا

یہ حیدرِ کرّار کہاں بول رہا ہے ؟

اے روحِ پیمبرؑ، تری اُمّت ہے پریشاں

شاید تری بیٹی تری اُمّت سے خفا ہے

ماتم کی صدا تیز کرو، سوچتے کیا ہو ؟

شبّیرؑ ابھی نرغۂ اَعداء میں گھِرا ہے

میں موت سے خائف ہوں نہ محشر سے ہراساں

محسؔن مری بخشش کی سند خاکِ شفا ہے