میں اس کو یاد کروں حرفِ بندگی کی طرح

میں اس کو یاد کروں حرفِ بندگی کی طرح وہ میری روح میں رہتا ہے روشنی کی طرح

شمارِ اشک و تبسم کیا کرو تم بھی ہمارے خانۂ گریہ میں بے بسی کی طرح

عجب گزیدۂ قسمت تھے ہم کہ جن کے یہاں سحر کا نور بھی اُترا تو تیرگی کی طرح

عجیب دشتِ بلا ہے یہ مہ جبیں دنیا حقیقتیں بھی تخیل ہیں زندگی کی طرح

شبِ ستم ہے سحر کون اب کرے گا یہاں مرے حسین کی دجلہ میں تشنگی کی طرح

یہ تیرا رنج و الم تیری آبرو کی قسم مرے نصیب میں لکھا ہے زندگی کی طرح

یہ بے حسی ہے کہ بے چارگی مجاہؔد کی اب ان کا ظلم بھی لگتا ہے منصفی کی طرح