ہوا کے سامنے رکھ کے دیا چلے آئے

ہوا کے سامنے رکھ کے دیا چلے آئے حسین ؑ جانبِ دشت ِ بلا چلے آئے

یہ زندگی کا تماشہ تمام ہوتے ہی تماش بین بنامِ وفا چلے آئے

میں ڈوبتے ہوئے سب کو بلا رہا تھا کہ جب تمام لوگ تمھارے سوا چلے آئے

کسی غریب کی بیٹی کا المیہ دیکھو جواں ہوئی تو کئی آشنا چلے آئے

سوال یہ تو نہیں تم نے کیوں بلایا ہے سوال یہ ہے کہ ہم کیوں بھلا چلے آئے

آنے والا وقت ہی یہ بتلائے گا کون کہاں کب کس کو چھوڑ کے جائے گا

گرچہ وقت کے دامن میں دن تھوڑے ہیں پھر بھی لگتا ہے وہ لوٹ کے آئے گا

دھڑکن دھڑکن ہر ایک سانس پہ سوچا کر کیا اس سانس میں کھوئے گا کیا پائے گا

ماں بیٹے سے رو رو کے یہ کہتی رہی مجھ کو چھوڑ کے جائے گا پچھتائے گا