تضمین
پاکستانی ادب-1994
Published 13 October 2026
غم تمہارا تھا زندگی گویا
تم کو کھویا اسے نہیں کھویا
فرط گریہ سے جی نہ ہلکا ہو
بس یہی سوچ کر نہیں رویا
اشک تو اشک ہیں شراب سے بھی
میں نے یہ داغ دل نہیں دھویا
میں وہ کشت نشاط کیوں کاٹوں
جس کو میں نے کبھی نہیں بویا
آبلہ آبلہ تھی جاں پھر بھی
بار ہستی کو عمر بھر ڈھویا
دیدہ و دل گواہ ہیں جاناں
سکھ سے جاگا نہ چین سے سویا
دوسرا کوئی ساتھ ہو کہ نہ ہو
تم مرے پاس ہوتے ہو گویا
About Ahmed Faraz (احمد فراز)
احمد فراز (1931–2008) پاکستان کے ممتاز اردو شاعر تھے، جو کوہاٹ میں پیدا ہوئے۔ تنہا تنہا، دردِ آشوب، نایافت، شبخون اور میرے خواب ریزہ ریزہ ان کے شعری مجموعے ہیں۔ غزل میں ان کا مقام زبان کی سلاست اور جذبے کی شدت کی بدولت ہے اور وہ اردو ادب کے بڑے ناموں میں شمار ہوتے ہیں۔
More Urdu poetry by Ahmed Faraz
- سنا ہے لوگ اسے آنکھ بھر کے دیکھتے ہیں (Ghazal)
- رنجش ہی سہی دل ہی دکھانے کے لیے آ (Ghazal)
- اب کے ہم بچھڑے تو شاید کبھی خوابوں میں ملیں (Ghazal)
- اس سے پہلے کہ بے وفا ہو جائیں (Ghazal)