آؤ! سارے رل کےگیت امن داگائیے

رب کرے ہر پاسے امن امان ہووے

نہیں کِسے دا ،بھورا وی نقصان ہووے رب کرے ہر پاسے امن امان ہووے

جنگاں تے ہوندیاں نیں، گھاٹے دا سودا حل تے نہیں ہوندیاں ایہ کِسے وی مسئلے دا جنگ تاں مسئلہ آپ اے، ساریاں توں وڈا کوئی نہ حیراں ہووے، پریشان ہووے رب کرے ہر پاسے امن امان ہووے

لاشاں دے تسیں بولھ لگا کے کیہ کرنا؟ لڑ کے آپس وچ کیہ جتنا ،کیہ ہرنا دوناں پاسے صرف لوکائی نے مرنا جھوٹھی اَنا تے کوئی نہ قربان ہووے رب کرے ہر پاسے امن امان ہووے

جنگ تاں، اک طرح دی ہولی خون دی اے گل ایہ پاگل پن دی،نرے جنون دی اے گل ایہ ، شاخ توں کچی کلی بھرون دی اے ہر کِسے دے دل نوں اطمینان ہووے رب کرے ہر پاسے امن امان ہووے

شہروں جنگلاں ول ایہ کیکن ٹر پئے او؟ فیر دِلاں وچ نفرت بیجن ٹر پئے او؟ کملیو!ایہ کیہ موت خریدن ٹر پئے او؟ پنڈ گراں نہ کوئی شہر ویران ہووے رب کرے ہر پاسے امن امان ہووے

نہیں کِسے دا ،بھورا وی نقصان ہووے رب کرے ہر پاسے امن امان ہووے